სალომე ქათამაძე: "იურმალასთვის 20 კილო უნდა დავიკლო"

მომღერალმა სალომე ქათამაძემ წლების წინ უკრაინაში გამართულ საერთაშორისო კონკურსზე "ჩილდრენ ოვ იუნივერს" ("სამყაროს ბავშვები") გრან პრი მიიღო და მსოფლიოს ოქროს ხმა გახდა. როგორც ჩანს, ეს ქვეყანა მომღერალს კარგად აქვს "დაცდილი", იქ რამდენიმე დღის წინაც წარმატება ჰქონდა – იურმალის კონკურსის მეორე შესარჩევ ტურში გაიმარჯვა კიდეც და ივლისში ლატვიის ცნობილ კურორტზე გააგრძელებს პირველობისთვის ბრძოლას.
ახლა კი წინასაკონკურსო სამზადისშია. გარდა იმისა, რომ სიმღერებზე მუშაობს, არანაკლებ დროს უთმობს იმიჯზე ზრუნვას. 20 კილოს დაკლება სჭირდება, რომ მისი გარეგნობა სასცენო სტანდარტებს შეესაბამებოდეს. ამისთვის ვარჯიში და დიეტაა აუცილებელი. ასევე უნდა, რომ კარგად გაირუჯოს. კლასიკურ სამოსთანაც შეჩვევა მოუწევს, აქამდე ხომ კედები და ჯინსი იყო მისი "ფორმა".
– სალომე, რატომ გადაწყვიტეთ იურმალაში მონაწილეობა?
– ბებიაჩემის დაჟინებული თხოვნა იყო, ამ კონკურსში მიმეღო მონაწილეობა. დედამ რომ აღმოაჩინა, სმენა მქონდა, მას მერე ბებომ მომკიდა ხელი და მუსიკალური განათლება მიმაღებინა. ჩემზე თან არის გადაყოლილი და მის ნება–სურვილს წინ ვერ აღვუდექი. სიმართლე თუ გინდათ, ეს არის – ბებომ მიმაღებინა ეს გადაწყვეტილება. ბოლომდე ვეწინააღმდეგებოდი, მაგრამ მაინც დამიყოლია. დამემუქრა, რომ თავს მოიკლავდა – ეს ხუმრობით. მერე დედაჩემმაც აუბა მხარი და ბოლოს და ბოლოს შევიტანე განაცხადი. აქაც ისე მოხდა, რომ მე და ნინი ცნობილაძე (ნინისთან ერთად სალომე ტელეპროექტ "ახალი ხმის" ფინალში გავიდა, სადაც გაიმარჯვა. ავტ.) აგვირჩიეს. კასტინგის დღეს ძალიან ვნერვიულობდი, რადგან ბევრი ჩვენი კოლეგა მონაწილეობდა. სამწუხაროდ, რაოდენობა შეზღუდული იყო, არადა გვეგონა, უკრაინაში ხუთი კონკურსანტი მაინც წავიდოდით. თბილისის კასტინგის შემდეგ მე და ნინი გამოგვიძახეს შემდეგი ტურისთვის.
– ვინ იყვნენ თბილისში ჟიურის წევრები?
– ვალერი მელაძე და ალექსანდრ რევზინი.
– რევზინს უთქვამს, ლამაზი ქართული ხმა ვერ ვიპოვეო.
– უი, არ ვიცი! როდის თქვა?.. მთავარი ის არის, რომ ამირჩიეს. ივლისში იურმალაში ვიმღერებ და იმედი მაქვს, ჩვენს ქვეყანას ვასახელებ. კიევში ნინის უთხრეს, რომ დაუკავშირდებიან და მოელაპარაკებიან. ძალიან გამიხარდება, თუ კონკურსზე საქართველოს ორი მომღერალი წარვადგენთ.
– ესე იგი თქვენ და ნინი ცნობილაძე "ბრძოლის ველზე" კვლავ შეხვდით ერთმანეთს.
– ეს თითქოს ბედისწერაა. ორივე რომ აგვირჩიეს, ერთმანეთს გადავხედეთ და გაოცებით ვიკითხეთ, კიდევ ერთად ვართ–თქო. ამაზე ორივემ ვიხუმრეთ. ნინი ძალიან მიყვარს, კარგი გოგია. ის ინდივიდუალურია.

– ნინი როგორ შეხვდა თქვენს გამარჯვებას?
– რა თქმა უნდა, გაუხარდა. სინამდვილეში არ ვიცით, ნინი კონკურსის მიღმა დარჩა თუ არა, რადგან კიევში კასტინგზე უთხრეს, დაგიკავშირდებითო.
– კიევში რა გარემოში გაიმართა კასტინგი?
– თბილისის კასტინგიდან ორი დღეც არ იყო გასული, იქ რომ გამოგვიძახეს. დათო ფორჩხიძის სტუდიაში მე, რუსა მორჩილაძემ და რუსა ბახტაძემ ღამე გავათენეთ, სიმღერები მოვამზადეთ. ვერ გეტყვით, რომელი სიმღერა ვიმღერე უკრაინაში, აკრძალული მაქვს. ინგლისურენოვანი "ვი არ ზე ვორლდ" შევასრულე და ერთადერთი კონკურსანტი ვიყავი, ვისაც თავიდან ბოლომდე მამღერეს სიმღერა. ჟიურიში იყვნენ "ახალი ტალღის" გენერალური დირექტორი ალექსანდრ რევზინი, კომპოზიტორი იგორ კრუტოი, მომღერალი ანი ლორაკი და უკრაინული ტელევიზიის ორი წარმომადგენელი.
– ჟიურის წევრებიდან ყველაზე დიდი მოწონება ვინ გამოხატა თქვენ მიმართ?
– იგორ კრუტოიმ. რომ ვმღეროდი, ვაკვირდებოდი და შედარებით კმაყოფილი სახით ჩემს გამოსვლას უსმენდა. სიმღერის დროს შემოვიდა ჩემში, რასაც მე ვგრძნობდი და იგივეს განიცდიდა ისიც. პრინციპში, რა მონაცემები და შესაძლებლობებიც მაქვს, კასტინგზე ყველაფერი გამოვიყენე. ვგულისხმობ ვოკალს, არტისტიზმს, მანერებს, მოძრაობას. სიმღერის დროს ვერ ვფიქრობ, რა გავაკეთო სცენაზე. პროექტში "ახალი ხმა" დედა ხშირად მეუბნებოდა, ხელებს რაღაცნაირად აყოლებ მუსიკასო.
– ემოციები მომღერალი ქათამაძეების სავიზიტო ბარათია. მუსიკაში იმდენად შედიხართ, რომ მანერებს ვეღარ აკონტროლებთ.
– ნინო ქათამაძე სცენაზე საერთოდ სალტოებს აკეთებს. ნინო, მიყვარხარ!
– იურმალას ქართულ ტურში ნინოს სიმღერას ხომ არ იმღერებთ?
– შეიძლება, არაფერია გამორიცხული.
– თქვენ და ქართული სიმღერა შორს ხართ ერთმანეთისგან?
– არა, რას ამბობთ! ქართული სიმღერის შესრულება შემიძლია, ამის პრეტენზია მაქვს. შეიძლება ისეთი დიდი ეფექტი ვერ მოვახდინო, როგორიც უცხოურების მღერისას გამომდის, მაგრამ ქართველი ვარ, ქართული სული მაქვს, ქართული გული, ჯიგარი, სიყვარული და რატომ ვერ უნდა ვიმღერო ქართული სიმღერები?!
– რა რეპერტუარით წარდგებით მსმენელის წინაშე?
– ჯერჯერობით ამაზე ლაპარაკი ნაადრევია. ერთი დანამდვილებით ვიცი, ქართული სიმღერის შესრულებისას ჩემი სამოსი ნაციონალური ელემენტებით იქნება შექმნილი.
– "ახალი ტალღა" რუსული პროექტია, თქვენ კი დასავლური ტიპის მომღერალი ხართ. "ევროვიზია" არ გერჩივნათ?
– რატომღაც ვფიქრობ, რომ შემიძლია რუსულ გემოვნებასაც მოვერგო. ჩემი აზრით, შემოქმედმა ადამიანმა ყველა ჟანრში უნდა მოსინჯოს საკუთარი ძალები.
– რა მოლოდინი და იმედები გაქვთ?
– ძალიან მინდა, რომ გავიმარჯვო. ჯერჯერობით ამაზე მეტის თქმა არ შემიძლია.
– კონკურენცია დიდია?
– ალბათ დიდია. კონკურსანტები არ მინახავს, მათ არ ვიცნობ. კიევში მოვუსმინე რამდენიმე უკრაინელ კონკურსანტს, ეს არის და ეს. სხვათა შორის, ძალიან კარგი ბავშვები აარჩიეს.
– კონკურსისათვის მზადება ალბათ უკვე დაიწყეთ.
– ბევრი მუშაობა მოგვიწევს რეპერტუართან დაკავშირებით. იმიჯი, ჩაცმულობა – ყველაფერი დასალაგებელი მაქვს. იურმალა კლასიკური კონკურსია, მაგრამ ჩემს სტილს არ დავკარგავ, უბრალოდ ბევრ ცვლილებას შევიტან. მაქსიმალურად უნდა ვიზრუნოთ იმაზე, რომ დიდი ეფექტი მოვახდინოთ.
– კიევის კასტინგზე კედებით და ჯინსებით გახვედით?
– ჟიურის წინაშე კლასიკური სამოსით წარვდექი, ავთანდილის კოსტიუმები მეცვა – პიჯაკი, პერანგი, კლასიკური შარვალი და ლამაზი კაბა–წინსაფარი. რაც მთავარია, ქუსლიან ფეხსაცმელზე ვიდექი. ამან ცოტა დისკომფორტი შემიქმნა, მაგრამ არა უშავს, ქუსლიან ფეხსაცმელზე სიარულსაც ვისწავლი.
– დიეტა და ვარჯიში დაგჭირდებათ?
– აუცილებლად დავჯდები დიეტაზე. მაქსიმუმი 20 კილო უნდა დავიკლო, მაგრამ ეს ჩემთვის პრობლემას არ წარმოადგენს. ვივარჯიშებ, კარგად გავირუჯები და ძალიან მოწესრიგებული გავალ სცენაზე.
– საინტერესოა, ხუთწლიანი წყვეტის შემდეგ იურმალა როგორ მიიღებს ქართველ კონკურსანტს.
– ამ პროექტს წლების განმავლობაში ვუყურებდი, მაგრამ მას შემდეგ, რაც საქართველო არ მონაწილეობდა, ნაკლებად ვაკვირდებოდი. ვფიქრობ, რომ კარგად მიგვიღებენ, რადგან ქართველები ნიჭიერი ხალხი ვართ, ნიჭთან ერთად კი დიდი სითბო, სიყვარული შეგვიძლია. ამიტომ მინდა, ამდენი წლის წყვეტის შემდეგ რაღაცნაირად განსხვავებულად წარვადგინოთ ჩვენი ქვეყანა. დიახაც, კარგები ვართ, მაგრები ვართ, დასაკარგი ერი არ ვართ და რასაც მოვინდომებთ, ყველაფრის გაკეთება შეგვიძლია!
– ეს წარმატება ვინ მოგილოცათ პირველმა?
– დედამ და დედას მეუღლემ, ჩემმა მეორე მამამ. კიევში ქმარი და მამაჩემი მახლდნენ. მათგან დიდ მხარდაჭერას ვგრძნობდი. მიხაროდა, რომ ჩემ გვერდით იყვნენ.
ლანა კიკნაძე